Арменія выйдзе з Арганізацыі Дамовы пра калектыўную бяспеку (АДКБ), калі палічыць патрэбным. Такую заяву падчас выступу ў парламенце зрабіў прэм’ер-міністр краіны Нікол Пашынян, перадае «Радыё Азатуцюн».
«Выйдзем [з АДКБ]. Мы вырашым калі. А вы што думаеце? Які наступны крок? Думаеце, вернемся назад? Не, іншай дарогі няма. Не турбуйцеся, назад не вернемся», — сказаў Пашынян.
Так палітык адказаў на пытанне апазіцыйнага дэпутата пра тое, чаму Арменія не выходзіць з АДКБ, нягледзячы на крытыку арганізацыі.
Ён таксама абвінаваціў ранейшыя ўлады краіны ў тым, што яны ўступілі ў «саюз-бурбалку», заснавальнікі якога не выканалі сваіх дамоўленасцяў, але «разам з Азербайджанам планавалі вайну» супраць Арменіі.
У армянскім МЗС лічаць, што ў заяве Нікола Пашыняна не ідзе гаворкі пра выхад краіны з АДКБ. Паводле кіраўніка ведамства Арарата Мірзаяна, прэм’ер проста «сказаў, што мы вырашым, калі выйсці, але назад не вернемся».
Нагадаем, у сакавіку Пашынян паведаміў, што Арменія фактычна замарозіла сваю дзейнасць у межах АДКБ і гатовая выйсці адтуль, калі партнёры не дадуць адказу на пытанне пра зону адказнасці арганізацыі ў краіне.
Паводле прэм’ер-міністра, у мінулым Арменія атрымала «вельмі выразную» пазіцыю ад сваіх партнёраў па АДКБ, у прыватнасці Расіі, наконт таго, што яе суверэнітэт — для іх чырвоная лінія. У выніку канфлікту з Азербайджанам, калі Арменія страціла Нагорны Карабах, гэтая чырвоная лінія была пяройдзеная, але саюзнікі не выканалі сваіх абавязанняў, лічыць ён.
Аддаленне Арменіі ад Расіі і АДКБ
Як пісала выданне Hraparak, прэм’ер-міністр Арменіі Нікол Пашынян у пачатку сакавіка казаў пра планы падаць заяўку Арменіі на ўступленне ў ЕС не пазней за восень 2024 года. Ён растлумачыў, што інтарэсы бяспекі рэспублікі «патрабуюць стаць мацнейшымі, калі не ў вайсковым плане, то хаця б у эканамічным».
Пасьля эскалацыі ўзброенага канфлікту з Азербайджанам у Нагорным Карабаху ў Ерэване раскрытыкавалі Расію за тое, што яна не аказала Арменіі належнай падтрымкі. У лютым 2024 года ўлады абвясцілі пра замарозку сяброўства Арменіі ў Арганізацыі Дамовы пра калектыўную бяспеку. У сакавіку ўлады рэспублікі скіравалі Расіі афіцыйны ліст пра спыненне працы памежнай службы ФСБ РФ у ерэванскім аэрапорце Звартноц.
Пашынян наўпрост казаў, што рэспубліка шукае новых партнёраў для вайскова-тэхнічнага супрацоўніцтва, бо не можа яго рэалізоўваць толькі з Расіяй. У верасні 2023 года Арменія правяла на сваёй тэрыторыі сумесныя з ЗША вайсковыя вучэнні, задачай якіх была падрыхтоўка да ўдзелу ў міжнародных міратворчых місіях.