Амбасада Італіі абвясціла пра правядзенне выбарачнага маніторынгу мэтавага выкарыстання выдадзеных візаў. Адпаведная абвестка з’явілася 12 жніўня на сайце італьянскага візавага цэнтра.
У паведамленні нагадалі, што атрыманне італьянскай шэнгенскай візы «прадугледжвае, што галоўнай краінай прызначэння будзе Італія (што не выключае транзіту цм знаходжання ў іншых краінах Шэнгенскай зоны)».
У сувязі з гэтым падчас паўторнага звароту па візу заяўнікаў просяць падаць пацверджанні ранейшых паездак у Італію. Гэта могуць быць:
- аплачанае пражыванне ў Італіі з указаннем прозвішчаў і датаў;
- аплачаныя білеты ў Італію;
- іменныя чэкі на выдаткі ў Італіі (сума аднаго — не менш за EUR 50);
- выпіска з банкаўскага рахунку, якая паказвае выдаткі ў Італіі;
- сумесныя фатаграфіі — для заяўнікаў па запрашэнні грамадзян Італіі.
«Вышэйзгаданыя матэрыялы не ўваходзяць у абавязковы пакет дакументаў, але могуць аказацца карыснымі для рашэння пра выдачу візы. Максімальны аб’ём — да 4 аркушаў», — удакладнілі ў візавым цэнтры.