Чыноўнікі працягваюць абмяркоўваць, што рабіць з законапраектам па сацыяльным абслугоўванні. Напярэдадні гэты дакумент абмеркавалі ў парламенце. Нагадаем, адно са змяненняў, якое хочуць увесці законапраектам, — перавод большасці беларусаў на атрыманне гэтых выплат праз банкі.
Пра які законапраект гаворка
Улады хочуць увесці змены па сацстрахаванні. Сярод таго, што прапануе ўрад, — новаўвядзенне па выплаце пенсій. Іх хочуць выдаваць у асноўным праз банкі, а магчымасць атрымліваць грошы праз пошту збіраюцца пакінуць толькі для некаторых беларусаў. Дэпутаты раскрытыкавалі прапанову ўрада, хоць і прынялі яго ў першым чытанні. «Дэпутатамі абгрунтавана паднятыя вострыя пытанні, недастатковая прапрацоўка якіх здольная адбіцца на сацыяльным самаадчуванні людзей», — заяўляла раней дэпутат Лілія Ананіч.
Дэпутат Ірына Супрановіч заявіла напярэдадні, што ў парламенце цяпер рыхтуюць законапраект да другога чытання. Мяркуючы з інфармацыі на сайце Палаты прадстаўнікоў, адрэдагавалі назву дакумента. Калі раней ён называўся «Аб змене законаў па пытаннях сацыяльнага абслугоўвання», то цяпер — «Аб змене законаў па пытаннях сацыяльнага абслугоўвання і сацыяльных выплат».
У Мінпрацы тым часам не адказваюць на пытанні, збіраюцца ўлады ўводзіць змяненне па спосабе атрымання пенсій ці адмовіліся ад гэтай задумы.
Што цяпер абмяркоўваюць чыноўнікі
15 верасня ў парламенце правялі паседжанне рабочай групы па гэтым нашумелым законапраекце. Акрамя дэпутатаў у абмеркаванні бралі ўдзел прадстаўнікі Мінпрацы, Мінэканомікі, Кіраўніцтва, адміністрацыі прэзідэнта, апарата Саўміна.
Як паведамляецца, на паседжанні абмеркавалі сярод іншага дзяржрэгуляванне дзейнасці арганізацый, якія аказваюць сацпаслугі праз стацыянарнае абслугоўванне.
Міністр працы і сацыяльнай абароны Ірына Касцевіч па-ранейшаму выступае за стварэнне і вядзенне рэестра пастаўшчыкоў сацыяльных паслуг, паведамляецца на сайце парламента.
Тым часам старшыня Пастаяннай камісіі Савета Рэспублікі па адукацыі, навуцы, культуры і сацыяльным развіцці Ірына Старавойтава не пагадзілася з кіраўніцай Мінпрацы і прапанавала альтэрнатыўны варыянт па дзяржаўным кантролі пастаўшчыкоў сацыяльных паслуг — увесці ліцэнзаванне.
«Праца па выпрацоўцы ўзгодненай пазіцыі па гэтым пытанні ў рамках падрыхтоўкі законапраекта будзе працягнутая», — заяўляюць у парламенце.
Пры гэтым не паведамляецца, ці абмяркоўвалі на гэтай сустрэчы перавод беларусаў на атрыманне гэтых выплат праз банкі.
Чытайце таксама
